[簡單曲奇] 忌廉芝士擠花曲奇 (Cream Cheese Spritz Cookies)

今次要分享既係忌廉芝士擠花曲奇 (Cream Cheese Spritz Cookies)✿

呢個食譜係買cookie press時送既, 但我自己都有稍微修改一下D份量。用cookie press好快就可以做好大量好靚而且大小一樣既曲奇。比起普通曲奇, 加左忌廉芝士既曲奇味道更加豐富。呢款曲奇的口感非常鬆脆, 而且有好濃既肉桂香味, 希望大家都會試下整啦!


✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿

材料 (以下份量可做約120塊曲奇) :

✿ 無鹽牛油 (室溫放軟) 227g

✿ 忌廉芝士 (室溫放軟) 85g (3oz)

✿ 砂糖 80-100g (原本的食譜是200g砂糖, 但我覺得太甜了, 100g就已經很足夠, 不喜歡甜的話可以再減少份量)

✿ 蛋黃 1個

✿ 雲呢拿油 1茶匙

✿ 中筋麵粉 340g (原本的食譜是約312g)

✿ 鹽 1/4茶匙

✿ 肉桂粉 1/2茶匙 (不喜歡可以不加)

做法:

今次我嘗試拍左個video, 希望D步驟可以清楚D, 不過條片既質素麻麻地, 睇下遲D有冇機會買部新相機啦lol   如果想睇文字版既, video下面都有, 不過因為拍左片, 所以今次相就少D☺

1. 預熱焗爐至175°C (350°F)

2. 把麵粉, 鹽及肉桂粉稍為攪拌, 放到一旁備用

3. 在另一個盤中, 把牛油跟忌廉芝士打勻

4. 加入糖, 蛋黃和雲呢拿油, 打至淡白及滑身 (約4-5分鐘)

5. 分3次加入備用的麵粉, 鹽及肉桂粉, , 慢慢打至融合 (切勿過份攪拌)

6. 把麵團放進cookie press, 在無油的焗盤上壓出曲奇 (也可以把麵團放進冰箱數小時再用曲奇模做曲奇)

 

7. 把壓好的曲奇放進冰箱10-15分鐘, 這樣可以減少曲奇烤焗時發漲的程度

8. 把曲奇放進已預熱的焗爐中, 焗8-10分鐘, 焗到一半時間後 (約4分鐘) 把焗盤左右翻轉

9. 當曲奇邊呈金黃色就是焗好了!

以下係完成品☺

希望大家可以試下整啦! 下次見☺

[Baking Summary] What I've Recently Made

前排忙做野冇乜時間影過程相分享, 不過成品相都有影下既
有小部份係耐少少之前整落, 但都POST埋啦☺

1. 香蕉朱古力粒馬芬 (Banana Chocolate Chip Muffins)

用香蕉整既muffins真係非常非常香! 而且食落都非常夠香蕉味。加上同佢絕配既朱古力, 真係次次一出爐就差唔多食晒

2. 忌廉芝士擠花曲奇 (Cream Cheese Spritz Cookies)

次次都整百幾塊! 呢隻曲奇比起普通既牛油擠花曲奇味道豐富好多, 請過好多人食都讚不絕口, 如果大家冇整過真係要試下!

3. 朱古力蛋糕 (Chocolate Cake)

呢個蛋糕其實都幾大, 大約12"x10", 佢同普通朱古力蛋糕既分別就係加左buttermilk☺ 所以佢既口感會比較柔軟同埋一D都唔乾!

4. 朱古力馬芬 + 忌廉芝士糖霜 (Chocolate Muffins with Cream Cheese Frosting)

之前未試過整cream cheese frosting, 覺得出到黎個效果都唔錯, 不過個frosting下次可以再打得好D

5. 牛油擠花曲奇 (Butter Spritz Cookies)

果次整左玫瑰花形狀✿ 非常之易整既曲奇! 而且好好食!

6. 朱古力冬甩 (Chocolate Donuts)

之前一直買左模但係冇用到, 今次趁有時間終於整左! 其實都非常易整! 不過加左裝飾之後就即刻食晒所以冇影相lol

7. 日式芝士海綿蛋糕 (Japanese Cotton Cheesecake)

呢個蛋糕又係個個都讚好食! 因為佢唔似cheesecake咁漏, 但又有好香既芝士味, 而且真係好似海綿咁, 質地係非常非常之軟! 不過自己覺得整既過程有D麻煩, 所以都唔係成日整

8. 林茲曲奇 (Linzer Cookies)

其實我都唔肯定佢個中文名係咩, 因為一直都淨係叫開「Linzer Cookies」~ 其實呢隻曲奇即係兩塊曲奇中間加左D果醬, 唔只賣相好, 味道亦都非常好!

9. 窩夫 (Waffles)

窩夫相信大家都食過, 所以冇咩好介紹啦lol 自己整窩夫真係又快又方便又好玩!

10. 薑餅人 (Gingerbread Men Cookies)

係上年聖誕果時整既~ 非常好食, 整左好多送俾人☺

今次就update到呢到先! 黎緊呢幾日因為都得閒所以會分享多D整野食既過程✿

遲D見啦☺

[新手整muffin] 超簡單雙重朱古力馬芬 (Easy Double Chocolate Muffin)

今次要同大家分享既係雙重朱古力馬芬 (Double Chocolate Muffin) ☺

雖然呢隻muffin材料比較多, 但其實非常非常整易!

(可以話你準備齊晒d材料已經完成左一半!!)

雙重朱古力馬芬 (Double Chocolate Muffin)

材料 (以下份量可做約12個muffin):

❀ 中筋麵粉: 220g

❀ 砂糖: 90g 

❀ 可可粉: 15g (2大匙)

❀ 泡打粉: 2茶匙

❀ 梳打粉: 半茶匙

❀ 鹽: 半茶匙

❀ 朱古力粒: 50g

❀ 菜油: 80ml

❀ 雞蛋: 1隻

❀ 牛奶: 240ml

❀ 雲呢拿油: 1茶匙

* 以上砂糖及朱古力粒的份量可隨個人口味增加或減少✿

做法:

準備：預熱焗爐至190℃

１） 把中筋麵粉、砂糖、可可粉、泡打粉、梳打粉、鹽和朱古力粒放進一個大碗中，然後把他們拌均勻。（暫稱為「乾材料」）

２）把菜油、雞蛋、牛奶和雲呢拿油放進另一個碗中，並打發均勻。（暫稱為「濕材料」）

３）把「濕材料」加進「乾材料」中，並用刮刀把他們拌均勻，切勿過份攪拌，基本上攪拌至看不到「乾材料」就可以了（見圖Ｄ）。

（雖然話唔好過份攪拌，但係亦都唔好攪得太少，攪得唔夠勻既話焗完出黎個muffin就會有白色既粉團係入面架啦！）

４）將紙杯放上muffin盤，將混合物倒進杯子，喜歡的話可以如圖Ｈ加一些朱古力粒在面作裝飾，然後放進已預熱的焗爐焗１５至１７分鐘。
（記得唔好裝咁滿，裝3/4杯已經ok，除非你好鍾意d muffin發到好高。想知道d muffin熟未，只需要將牙籤拮入muffin中間，拉返出黎既時候如果冇d好濕既混合物痴住就ok架啦！）

完成！！

焗出黎既muffin一D都唔乾，仲好香朱古力味☺

今次其中一盤焗耐左少少，趁熱食既時候muffin個平仲係脆既！

唔裝太滿焗出黎個形狀會好睇Ｄ

希望大家都會試下整啦☻

[新手整曲奇] 簡易綠茶曲奇 (Green Tea Matcha Cookies)

第一次打blog, 想分享下自己整野食既過程, 本人絕對唔係專業, 只係鍾意整野食同埋試新食譜☺

今次會分享一個好簡單既綠茶曲奇食譜 (上圖), 呢一隻曲奇因為加左粟粉所以會比較鬆化
由於整既時候有d趕時間, 所以焗完後部份曲奇有D裂痕☹
雖然賣相未係最好, 不過都唔影響味道☺

由於糖既份量唔多, 所以整出黎既曲奇唔會太甜, 加埋個白朱古力係面我覺得甜味岩岩好

呢隻曲奇用既牛油唔算多, 所以唔會好重牛油味, 亦都健康D
***因為整既時候成日將D野搬黎搬去, 搞到燈光成日都改變, 令影出黎既相顏色都唔一樣, 唔好意思☹

簡易綠茶曲奇 (Green Tea Matcha Cookies)

首先睇下要用既材料 (以下份量可做約30塊曲奇):

❀ 牛油(室溫放軟): 70g

❀ 砂糖: 60g

❀ 蛋黃: 2隻

❀ 牛奶: 15ml (1大匙)

❀ 蛋糕粉: 100g

❀ 粟粉: 100g

❀ 綠茶粉: 20g (4荼匙)

❀ 白朱古力 (optional)

做法:

１） 把蛋糕粉、粟粉和綠茶粉一起過篩，然後放到一旁備用。

２）先把牛油稍為打軟一點，加入砂糖，再打至忌廉狀，顏色會較白和滑身。（如圖Ｄ）

３）加入蛋黃和牛奶，打至完全融合。（如圖Ｆ）

４）加入之前篩好的蛋糕粉、粟粉和綠茶粉，慢慢攪拌至如圖Ｉ狀就好了，不要過份攪拌。

（我一開始選擇用手打係因為唔想Ｄ粉飛起晒，好容易整污糟其他地方，但當麵團變到好似圖Ｈ咁既時候，佢會好容易痴住個打蛋器搞到一舊野咁，所以最後我就轉用電動打蛋器再打幾十秒）

５）將麵團放到乾淨的平面上，慢慢搓成圖Ｋ狀，再用保鮮紙包好，放進冰箱約一小時。

６）取出麵團前，先把牛油紙鋪在焗盤上，同時亦可以把焗爐預熱至175℃。

７）一小時後取出麵團，並準備小量蛋糕粉。把麵團如圖Ｐ一分為二，未用的一半先包好放回冰箱。

（如果麵團太硬的話，可在取出後置於室溫約５至１０分鐘）

８）把少量蛋糕粉灑在平面及rolling pin上，以防麵團黏住。把麵團擀至約0.5cm厚後，便可以用曲奇模造型，再放到焗盤上。

（焗之前可以將曲奇放入雪櫃雪多10分鐘, 咁係焗既時候d曲奇就唔會發漲得咁勁；另外因為今日好趕時間咁整，所以個麵團擀得比較求其，令到部份cut出黎既曲奇有好多裂痕（見圖Ｔ＆Ｕ），大家千其唔好學我 : (）

９）放進已預熱至175℃的焗爐中焗10至13分鐘。

（如果焗爐左右兩邊既熱力唔均勻，可以係焗左5,6分鐘後左右調轉個焗盤, 不過要快手）

１０）焗至曲奇邊變成金黃色就完成。（如圖Ｗ）

＊１１）如果家裡有白朱古力的話，可於曲奇完全放涼後加上白朱古力作裝飾。

（由於我自己覺得呢隻曲奇本身唔係好甜，所以鍾意好似圖Ｙ同Ｚ咁加返ｄ白朱古力係面，我係用圖Ｘ果隻裝飾用朱古力，只要用熱水浸溶就可以擠係曲奇上面，都幾方便☺雖然呢個係optional，但係加左朱古力真係好味好多，賣相亦都靚Ｄ！☺）

希望大家都會試下整啦！有咩問題或者意見歡迎留comment俾我✿

我一得閒就會再分享整其他野食既心得☺